ភ្នំពេញ៖ ប្រធានាធិបតីនៃសាធារណរដ្ឋសង្គមនិយមវៀតណាមលោក ង្វៀន សួនហ៊្វុក នឹងមកបំពេញទស្សនកិច្ចនៅប្រទេសកម្ពុជាពីថ្ងៃទី២១ ដល់ថ្ងៃទី២២ ខែធ្នូ ឆ្នាំ២០២១។ ក្នុងដំណើរទស្សនកិច្ចនោះលោកនឹងចូលគ្រាបបង្គំគាល់ព្រះមហាក្សត្រកម្ពុជា ព្រះសង្ឃរាជទាំងពីរគណៈ និងជួបពិភាក្សាការងារជាមួយសម្ដេចប្រធានព្រឹទ្ធសភា រដ្ឋសភា និងសម្ដេចតេជោនាយករដ្ឋមន្ត្រីផងដែរ។
ក្នុងសេចក្ដីប្រកាសព័ត៌មានចុះថ្ងៃទី២០ ខែធ្នូ ឆ្នាំ២០២១នេះ ក្រសួងការបរទេសបានលើកឡើងថា៖ «ឯកឧត្តមប្រធានរដ្ឋ នឹងអញ្ជើញធ្វើជាអធិបតីជាមួយសម្ដេចអគ្គមហាពញាចក្រី ហេង សំរិន ក្នុងពិធីបញ្ចុះបឋមសិលាសាងសង់អាគាររដ្ឋបាលថ្មីនៅក្នុងវិមានរដ្ឋសភា និងជាមួយសម្ដេចតេជោនាយករដ្ឋមន្ត្រី ហ៊ុន សែន ក្នុងពិធីចុះហត្ថលេខាលើឯកសារសំខាន់ៗមួយចំនួនផងដែរ» ។
លោក ង្វៀន សួនហ៊្វុក គឺជាប្រធានាធិបតីវៀតណាមទី១០ ដែលជាតំណែងកំពូលក្នុងប្រព័ន្ធនយោបាយវៀតណាម។ លោកក៏ធ្លាប់ជានាយករដ្ឋមន្ត្រីនៃប្រទេសវៀតណាមពីឆ្នាំ២០១៦ដល់ឆ្នាំ២០២១៕
